香港航空貴賓室 – 遨堂 Club Autus (體驗報告及入lounge方法)

遨堂 Club Autus 係港航設於中場嘅一個新lounge，佔地成萬3呎，每日由上午6點開到去最後一班機離港為止，即係都開到成凌晨2點㗎！呢個lounge同紫荊堂比，除咗面積大好多之外，嘢食同嘢飲方面亦多好多選擇！酒方面有提供cocktail，而必試嘅梗係佢嘅seasonal cocktail Hong Kong Sky啦！另外嘢食方面都好吸引，20米長嘅食物枱可謂機場之最，必試嘅梗係雞蛋仔啦，超級好味！佢個雞蛋仔除咗有原味之外，每日仲有廚師推介嘅口味，我個日就係芫茜味雞蛋仔，我本身勁憎食芫茜都覺得好香好入味呀！！！

各大機場貴賓室進入方法：https://flyformiles.hk/4108

香港航空貴賓室 – 紫荊堂Club Bauhinia：https://flyformiles.hk/19164/

香港航空貴賓室 – 遨堂 Club Autus 開放時間

早上6時至凌晨1時30分

香港航空貴賓室 – 遨堂 Club Autus 位置

T1中場7/F，近Gate 210

遨堂 Club Autus 進入方法

香港航空既lounge，就算你唔係佢既高級會員都好，只要你係坐香港航空，都可以用信用卡入：
中銀香港航空Visa卡 (一個曆年有5個quota入lounge，可帶人入)
建行港航Fly Away信用卡 (一個曆年有5個quota入lounge，可帶人入)
ICBC香港航空Visa白金卡  (一個曆年有5個quota入lounge，唔可以帶人入)

遨堂呢個20米長嘅食物枱可謂機場之最，由沙津吧到熱盤到湯到麵都齊哂！其實仲有另外一面都有嘢食添㗎！

坐A350當然要入嚟呢個lounge坐吓啦～

呢個lounge嘅設計係以環保同天然作主題，所以顏色都以啡同綠為主，令到大家好似入咗個森林之中

鍾意飲茶嘅朋友就唔好錯過呢個本地摩登茶吧「jrink」啦！佢每個季節都會為大家提供唔同嘅茶，尤其係花茶添！似唔似平時去cafe飲嗰啲呢～～

呢個Cocktail section我就最鍾意！尤其係宜家杯Seasonal Cocktail Hong Kong Sky！佢係Vodka溝Coconut，好易入口又舒服！至於側邊個杯就係Signature Drink Autus Delight，有加酒精同無酒精揀，所以唔飲得酒嘅都可以一試㗎！

Noodle bar又係一個不得了嘅地方！大家一定一定要食佢個喇沙同雞蛋仔，真心好食！個喇沙超級夠味，我仲飲哂成個湯！然後新鮮出爐即刻食嘅雞蛋仔就唔使講都知勁好味勁夠味啦！好彩仲可以撞到廚師推介，食到其他特別味，我嗰日就係芫茜味，聽聞之前仲有朱古力、抹茶味添㗎！同埋食素嘅朋友都一定要試佢個菠菜麵，我初頭都以為咁齋實好淡，係有個photo哥哥叫我食啖，先知佢連個菠菜麵都整得咁夠味！仲有豆腐花大家記得要快手去食，因為好快會俾人撩到啲豆腐碎哂，得返啲水㗎啦～

遨堂 Club Autus 嘅意思係翱翔天際，象徵住香港航空嘅業務能夠騰飛發展！