之前有唔少人同我講話佢地雪季換到去北海道既機票了 (呢排都未見有再放位，有既再話俾大家知)，所以佢地都plan緊去北海道二世古呢個明星滑雪場😍 咁我今年年頭個雪季就啱啱去完，所以post返俾大家睇俾大家參考下！因為啱啱個年日本先啱啱開關，雪季超級短，所以嚟緊呢一年係一個完整既雪季，會有勁多歐洲人去二世古滑雪！故此大家要換酒店，就快手換呀！
✅ Park Hyatt Niseko介紹
講返Park Hyatt Niseko Hanazono 日本二世古柏悅酒店呢間酒店，雪季時一晚差唔多100,000 yen！點解會咁貴？滑開雪既人一定聽過Ski-in Ski-out酒店！即係由酒店一出就出到去滑雪場可以坐纜車上去滑雪！唔使再坐多程車先去到雪場！所以你想一日滑晒朝早、晏晝同夜雪都無問題！因為真係太近了！而且你係Park Hyatt住客仲包埋locker俾你！一入返酒店有人主動出黎幫你搬雪板，又有熱朱古力同水拎！二世古除咗出名粉雪多外，又望到有「北海道富士山」之稱既羊蹄山，個景超靚！呢啲Ski-in Ski-out既五星級酒店，亦係吸引咁多明星冬天去滑雪既原因！我去滑個陣原來徐濠縈都喺附近添呀！
✅ Park Hyatt Niseko兌換方法
100,000yen一晚我當然住唔起啦！但用積分換一晚就係30,000/40,000/45,000分！真係慳返唔少！而且Globalist 預訂仲會送早餐添！佢個早餐超級豐富！真係千祈唔好錯過！
✅ 房型
其實用積分兌換既山景客房，都已經係成間Suite咁大！有一個廳有晒sofa，一張長枱，一個可以拉埋既睡房，兩個廁所！而且個浴缸係有景既！我個人覺得已經係唔需要用套房券去升套房！不過想影俾大家睇，我都浪費咗張套房券lol 升咗既最普通個種套房，其實只不過係多多一個廳咁… 個廳係直接有景，不過變咗廁所浴缸就無景，反而我覺得無咁靚添！但其實佢大既程度，真心係可以住4個人，所以如果成班人去滑雪的話，book間套房都唔錯！
✅ 早餐
Park Hyatt個早餐真係不得了！中式、西式、日式樣樣都齊！特別推介大家一定要飲佢個熱朱古力，真心好正！我發覺間間Park Hyatt既熱朱古力都係超好飲的haha 同埋佢juice 同detox water 都有，生果又多，真係食完一定有屎痾！不過我個陣住，日日都去滑雪，所以真心唔敢食咁飽，但個早餐咁多野食真係勁浪費呀><
✅ 滑雪場
Park Hyatt Niseko最值錢就係佢Ski-in Ski-out酒店！不過要留意返，Park Hyatt Niseko條滑雪線其實比較多紅線既，所以對初學者黎講都係有啲難度，但如果係高級貴婦滑雪團的話，住Park Hyatt真超級無敵！如果你話初學者既，其實係住Ritz Carlton 或者Hilton會更加好啲！不過就當向難度挑戰吧！哈！
✅ 餐廳
Park Hyatt Niseko啲餐廳有好多！中西日鐵版燒樣樣都有！佢個鐵版燒Teppan都幾出名既！不過雪季期間，因為個個人都會滑完雪stay喺酒店，所以啲餐廳係超級full！因為book咗酒店後記得要book定餐廳！至於最經濟既，就係食佢間西餐廳Olivio，2千幾yen就有個main其實喺酒店餐廳黎講真心勁抵！因為我每日都滑到勁攰其實我真係無乜胃口食野，哈哈！
✅ 泳池、Gym及溫泉
酒店另一個賣點就係有兩個公眾溫泉係可以俾大家浸，朝6晚10咁，主要係有兩個大池，一個42度同一個40度，入面乜都無無景無乘既，不過滑完雪可以返去浸個溫泉你就知係有幾舒服了！另外泳池係25米室內暖溫池黎，其實真心係可以游下的，但咁滑雪法真係無晒力hahahaha
✅ 泊車
基本上Park Hyatt出面都幾多室外位泊，你泊室外的話就唔使錢！同埋我發覺職員仲要定時定候同你剷雪，所以都唔使擔心雪呢個問題，放心泊出面吧！
最後，再提返大家，北海道二世古喺雪季個陣，真係full到七彩！無論係酒店定餐廳都係！同埋啲滑雪教練都full到七彩！所以有心喺黎緊一年去滑雪既，就真係要book定啦！
官網詳情： https://www.hyatt.com/zh-HK/hotel/japan/park-hyatt-niseko-hanazono/ctsph
日本二世古柏悅酒店 Lobby
日本二世古柏悅酒店 套房
日本二世古柏悅酒店 山景客房
日本二世古柏悅酒店 早餐
Park Hyatt Niseko Hanazono 滑雪場
Park Hyatt Niseko Hanazono 溫泉、Gym、泳池、SPA
Park Hyatt Niseko Hanazono 餐廳
Park Hyatt Niseko Hanazono 地圖、泊車及交通
地址：328-47 Aza Iwaobetsu, Kutchan-cho, Abuta-gun 北海道, 日本, 044-0082
電話：+81 136 27 1234
電子郵件：[email protected]
預訂：+81 136 27 1233
😀 😀 😀 😀 😀 😀 我是一條分隔線 😀 😀 😀 😀 😀 😀
記得同時要like埋我 facebook，仲要撳埋"see first"， 咁先會第一時間睇到我出既最新優惠！
同埋梗係要follow 埋我Instagram，睇我啲靚相同IG Story啦！
