善用Asia Miles 網頁工具！飛行獎賞計算器及網上新兌換平台簡介！

同大家講過新制Asia Miles咁多隻換法，但都未講過Asia Miles 新既飛行獎賞計算器及網上新兌換平台。雖然我自己都寫佐個計算器，但始終官方既計算器先係最正統既方法。另外佢新既網上平台唔似以前咁，想睇其他class既位都要彈出又彈入咁睇，宜家唔單止係唔同class既位都可以一次過睇到，仲可以同時睇埋標準賞、靈活賞同隨心賞所需要既里數，變佐search一次就知有位定無位可以了佐件心事啦！但當然個計算器同網上新兌換平台都有未完善既地方，宜家就同大家講下！

官方飛行獎賞計算器：https://www.asiamiles.com/zh/afr.html

網上新兌換平台：https://api.asiamiles.com/redeem-flights

飛行獎賞計算器

新既飛行獎賞計算器分為兩個功能，第一個係俾你有目標地輸入航點及行程，然後佢就會同你自動計算出所需要既里數。不但係來回、單程定係多個目的地 (Multi Cities)，甚至係夥伴航空公司既機票都可以search到要用幾多里數。一search就搵到，唔使自己計黎計去！

呢個功能尤其係你換「寰宇一家」聯盟成員獎勵機票既時候特別有用！因為你一search就可以搵晒你成個行程所需要既里數！例如以下呢個行程：

香港-紐約 (國泰航空) 停留1
紐約-香港 (國泰航空) 停留2
香港-曼谷 (皇家約旦航空) 停留3
曼谷-香港 (國泰航空) 停留4
香港-台北 (國泰航空) 停留5
台北-香港 (國泰航空) 開口1
新加坡-吉隆坡 (馬來西亞航空) 開口2
廣州-香港 (港龍航空)

一search就知道係要165,000換商務啦！

但留意返一樣野，呢個計算器雖然好好用，但要留意下如果換唔係國泰執飛既航線時，佢好多時會show埋其他code share flight 既航空公司，例如大阪去首爾咁：

其實佢只有大韓同韓亞等唔係Oneworld或Asia Miles既Partner去飛，日本航空同美國航空只係code share flight，根本呢條航點就無Oneworld機飛既，所以有時大家就要去自行判斷究竟呢條航線有無Oneworld或Asia Miles既Partner去飛啦！可以參考返Oneworld既route map。

同埋呢個計算機由於佢係suppose你成個行程都坐同一個class，但好多時換內陸機咁短坐business都晒氣，所以我都會建議大家混艙咁換，但呢個計算機就計唔到混艙所需要既里數，所以大家可以用返我寫呢個計算機黎計返混艙既里數。

另外一個功能，就係叫「給我靈感」。有時你有好多里數又有個假唔知飛邊，你就可以喺呢個功能到輸入你有既里數，然後揀返你想坐既class同日子，咁佢就會show究竟自己有邊啲航點係有位俾你換啦！

例如呢到我輸入20萬里，然後再打想坐頭等同輸入日期，就出到如果我想喺個段日子坐頭等的話，就可以去北京同高雄啦！

不過呢個功能有個未完善之處，就係淨係搵到國泰機同埋只係得最近3個月既位，如果遲啲整到可以搵一年既位就正啦！

網上新兌換平台

呢個網上新既兌換平台相信係大家最關心既地方，但首先佢同以前一樣，淨係兌換到國泰、港龍、英航、Finnair、Iberia、Qantas、Qatars同Alaska既航班，所以如果大家要兌換其他航空公司或者你既行程裡面包括唔屬於以上既航空公司，就一定要打去hotline到換啦！

先要讚一下新既兌換平台畫面，佢唔似以前咁，想睇其他class既位要彈出又彈入咁睇，宜家喺同一個畫面到係可以撳一下就睇晒唔同class既位，仲可以同時睇埋標準賞、靈活賞同隨心賞所需要既里數，而且仲可以去程換經濟，回程換商務咁都得！非常靈活！不過同一套來回機票既去程同回程就必須屬於同一個獎賞類別，即係去程用佐靈活賞就回程都要用返靈活賞！所以如果大家想一程用標準賞一程用靈活賞的話，就分開兩個單程換吧！

另外，新系統亦可以換到啲轉機既航班，例如我想坐去倫敦再轉機去冰島，喺新系統裡面都可以換到！

但新系統始終解決唔到同一個問題，就係如果行程包括任何停留的話，例如我想飛到倫敦之後留幾日先再出發去冰島，咁既情況就一定要打電話去換啦！

雖然新系統仲有唔少改善既空間，但佢改佐版變佐方便佐同一目了然係事實，對於大家喺佢個系統到搵機位再打去出機票都幫助不少既！

😀 😀 😀 😀 😀 😀 我是一條分隔線 😀 😀 😀 😀 😀 😀

記得同時要like埋我 facebook，仲要撳埋"see first"， 咁先會第一時間睇到我出既最新優惠！

同埋梗係要follow 埋我Instagram，睇我啲靚相同IG Story啦！