【泰國曼谷機場Priority Pass Lounge – Miracle Lounge】營業時間、地點、設施、食物及進入方法！

泰國曼谷 Miracle Lounge

你地成日笑香港環亞係公廁lounge，如果要講泰谷既公廁lounge，咁就一定係Miracle Lounge！成個曼谷BKK Suvarnabhumi 機場，我都數唔到有幾多個Miracle Lounge，因為佢成日又開又閂咁，我諗應該有6個？而且佢每個lounge 淨有少少唔同，不過就有一樣共通點，就係好好好好好好多人！其實Miracle Lounge都真係Priority Pass先入到，但我估因為佢夠平？好多airline都買咗佢黎做lounge所以先咁多人！我唔知架！我都係靠估的！哈！

暫時我手上既相就整理咗少少唔同Miracle Lounge有乜分別出黎：

• 國際線 D 大廳：夠大！有海南雞飯食！亦有雪糕拎
• 國際線 F 大廳：最方便！實望到，但比較細，野食亦都唔多！但都有海南雞同啲泰國粉咁！
• 國際線 G 大廳：好大！分兩層Business 同 First，其實就無乜分別既！野食勁多！咖喱飯、蒸包、西湯應有盡有，但我印象上係無海南雞同啲泰國粉既，美中不足咁

其實Miracle Lounge唔止呢3個既，佢差唔多基本上每個大廳都有一個咁滯，但我就未有相住，有機會先再整理俾大家睇！雖然Miracle Lounge就成日都好多人，但佢啲海南雞同啲泰國粉又真係幾正，順路既可以入去食返碗啦！橫掂張Priority Pass 係任用既！跟住食完野再去The Coral同TK Lounge 揼骨hahaha 正呀！

至於進入既方法，就係持有Priority Pass就可以進入！同埋記得如果你係AE白金卡送個張Priority Pass，係可以帶多1個人添架！即係可以兩個人一齊入啦！仲有AE白金卡送個張Priority Pass係無限使用既關係，所以你可以入到一個lounge 又入一個架！所以下次去Bangkok有時間可以入呢個lounge 行個白鴿轉啊！

機場貴賓室最新信用卡列表 (呢個post齊晒香港機場有咩lounge既介紹同埋點樣免費入既方法！同埋有咩卡送Priority Pass)

進入方法

• 使用Priority Pass

泰國曼谷 Miracle Lounge 國際線 D 大廳

• 營業時間：每日 24 小時
• 地點：(Bangkok Suvarnabhumi Intl) 曼谷素萬那普國際機場, 國際線 D 大廳 空側 – 國際離境大堂。3 樓，D5 閘口對面

泰國曼谷 Miracle Lounge國際線 F 大廳

• 營業時間：每日 24 小時
• 地點：(Bangkok Suvarnabhumi Intl) 曼谷素萬那普國際機場, 國際線 F 大廳 空側 – 國際離境大堂。3 樓 (西側)

泰國曼谷 Miracle Lounge國際線 G 大廳 Business + First

• 營業時間：每日 24 小時
• 地點：(Bangkok Suvarnabhumi Intl) 曼谷素萬那普國際機場, 國際線 G 大廳 空側 – 國際離境大堂。3 樓，2 號閘口對面 (西側)