【歐洲退稅攻略】資格、流程、方法、注意事項全攻略！仲有親身踩雷實例！

去歐洲買野退稅真係好多技巧！例如如果間舖頭係用呢間planet！你退稅額又過1,000 euro！咁佢就淨係可以退落信用卡 或 拎你居住地現金！咁我揸bno去所以佢話可以拎GBP或HKD！如果退EUR扣完planet手續費就應該係退1,736！但退GBP係1,325、港紙係12,520！個rate西到爆！

所以唯一選擇係揀退1,736 euro落信用卡！但要等6個星期仲要驚退唔到好難追！同埋一樣要再被收1.95%手續費！同埋都驚會有爛rate >< 到時退咗幾多再同大家講下！

所以下次去歐洲買野真係一張單唔好過8,300 euro左右！唔係退多過1,000euro稅就好似我宜家咁咁煩😭😭

為咗唔好令大家都同我一樣踩晒雷，我整理咗啲歐洲退稅攻略俾大家！請大家真係要碌到最底睇下注意事項個到！因為個堆就係我今次去歐洲總結出黎既結論 🙁

歐洲退稅攻略 德國退稅 資格

• 非歐盟國家公民，於德國沒有固定居所，有其他國家居定居所
• 於同一間商店、同一天內，購買的商品總金額須超過25歐元 (稅後)
• 商品必須於購買後3個月內攜帶出境，不能在歐盟國家使用。
• 部分商品，例如如車、配件以及服務業消費 (如交通、餐飲、住宿、簽約手機/SIM卡) 等，不適用退稅

歐洲退稅攻略 德國退稅 流程

機場辦理退稅

• 購物後向店員索取正式收據及退稅單，記得留意睇清楚係咪正式收據，並唔係copy
• 喺由歐盟國離開時，即辦理退稅係喺你最後一個離開的歐盟國辦理
• 到機場櫃台辦理check in手續，必須領取boarding pass
• 如你的退稅品需要寄艙，要告知地勤人員行李中有要退稅既商品， 地勤人員會喺手續辦理完畢後，叫你拎返走件行李，唔好寄艙！千祈唔好寄艙，寄咗就退唔到了！
• 再拎齊boarding pass、退稅單、護照、購買的商品及收據，去海關個到俾海關人員檢查 (有時會叫你拆埋盒成件野拎出黎俾佢睇，所以千祈唔好整到啲野咁亂)，確認後會蓋章確認，記得check 清楚係咪每一張退稅單都已經蓋章
• 最後根據退稅單上的指示，到指定櫃檯或郵寄地址領取退稅金
• 如你的退稅品係喺手提行李，則俾海關蓋章確認既位置會係喺出境後，而唔係出境前，俾海關蓋章確認後，再根據退稅單上的指示，到禁區內指定櫃檯或郵寄地址領取退稅金

邊境海關櫃檯退稅

• 購物後向店員索取正式收據及退稅單，記得留意睇清楚係咪正式收據，並唔係copy
• 喺由歐盟國離開時，即辦理退稅係喺你最後一個離開的歐盟國辦理
• 去海關個到俾海關人員檢查 (有時會叫你拆埋盒成件野拎出黎俾佢睇，所以千祈唔好整到啲野咁亂)，確認後會蓋章確認，記得check 清楚係咪每一張退稅單都已經蓋章
• 最後根據退稅單上的指示，到指定櫃檯或郵寄地址領取退稅金

市內退稅

• 購物後向店員索取正式收據及退稅單，記得留意睇清楚係咪正式收據，並唔係copy
• 喺由歐盟國離開時，即辦理退稅係喺你最後一個離開的歐盟國辦理
• 帶同退稅單、護照、購買的商品及收據，去市內退稅櫃位直接領取退稅金，並提供信用卡資料作擔保
• 於機場出境時，需帶同退稅單、護照、購買的商品及收據俾海關人員檢查 (有時會叫你拆埋盒成件野拎出黎俾佢睇，所以千祈唔好整到啲野咁亂)，確認後會蓋章確認，記得check 清楚係咪每一張退稅單都已經蓋章
• 再根據退稅單上的指示，寄回已蓋章既退稅單
• 如無寄回，就會charge落你張credit card到

歐洲退稅攻略 退稅單填寫教學

睇退稅單係用邊間公司，但必須包括以下資料：

• 個人資訊：護照號碼、姓名、國籍、地址等。
• 購物資訊：購買日期、商品明細、金額等。
• 出境資訊：離境日期、退稅方式（現金/信用卡）等。

留意返如退信用卡的話，係需你自己填寫信用卡號碼，所以千祈唔好填錯！

歐洲退稅攻略 德國退稅公司

去過一次發覺通常係用呢兩間：

Global blue

Hermes、Prada、Celine、Dior、Rimowa等都係用呢間

Planet

我淨係得一間Chanel 係用 Planet

歐洲退稅手續費

基本上我都唔知佢點收！以下係我用Global blue同Planet喺機場退稅既手續費：

Global blue

每張都收5-6%手續費！好貴！所以千祈唔好揀喺機場退現金！朋友話喺市區唔收手續費的！

Planet

原本我係要退1,771.77 EUR，

• 退EUR的話，只係收大約35EUR手續費，大約係2%左右
• 但佢唔可以直接退EUR現金俾你，因為退稅額超過1,000 EUR的話，就只可以選擇退：
  • 信用卡 或
  • 你居住地貨幣
• 因為我係用BNO，所以可以揀拎GBP或HKD
  • 退GBP現金係1,325
  • 退HKD現金係12,520
• 無論係退邊樣個exchange rate 都勁差！我最後揀咗退信用卡，到時再update下大家個rate係點

歐洲退稅 大約預既時間

• 我於起飛前3小時到機場
• 但航空公司只能夠喺2個半鐘前先check得in
• 我係第2個人check in
• check in->海關蓋印->拎現金 (分別去咗兩間退稅公司拎)->過安檢->出境
• 最後我只係起飛前1小時左右先入到禁區hea，但其實過半個鐘後已經要boarding
• 講返係我拎現金同過安檢都唔使排隊，只係海關蓋印同出境排咗一陣
• 所以起碼要預返3個鐘

注意事項

以下係有血有汗既經驗分享：

• 退稅如果有得揀記得要揀退現金，而且要係原幣，即係本身退歐羅就要揀返拎歐羅現金，唔好拎其他貨幣，個rate 一定勁差
• 退稅盡量喺市區拎現金退，咁樣手續費會低啲
• 有得揀的話都唔好揀退信用卡，一來其實都有charge；二來有Exchange rate risk，你退個下個貨幣升咗你就賺少少，跌咗你就蝕更多；三來要等6個星期，退唔退到都唔知…
  • 逼住要揀的話，揀啲唔收信用卡海外簽賬手續費既卡，例如渣打Smart卡，咁會蝕少啲；或者用啲扣賬卡Debit Card
    • HSBC扣賬卡
    • Citi扣賬卡
    • 中銀扣賬卡
    • 恒生扣賬卡
    • 渣打扣賬卡
  • 信用卡退稅，銀行會當咗你係商戶退款會扣返你積分的，所以又最好揀張你平時唔會用既卡，等佢扣到負分算！又或者用扣賬卡，咁就唔會出現扣分情況
• 買野盡量一張單唔好過8,300 euro，退多過1,000 EUR稅就好麻煩，一係淨係可以揀退信用卡，一係淨係可以拎你居住地貨幣硬食爛rate